2026 Wae waerd de nieje Drakeprins ?

UPDATE:  Jeroen II (Killaars) oetgerope as Drakeprins 2026

17 januari 2026

Tiedes de Nach van de Prins is Jeroen  Killaars oetgerope toet prins Jeroen II van CV de Drake. Hae geit dit jaor same mit zien adjudante Sten (Simons) en Ferd (Beek) de Beeselse vastelaovend veurop ónger zien motto: 

Loat mer rolle !

In ’t dageliks laeve haet Jeroen (25) zien eige sjildersbedrief. Es d’r efkes neet mit ‘ne kwas of roller in de henj sjteit, is d’r te vinje oppe wielrenfiets en drink d’r ouch gaer ’n pötje beer mit zien vrunj. Hae is drök mit zien vriendin Lotte aan ’t verbouwe in ’t hoeës det ze same höbbe gekóch. Jeroen is de zoon van sjlechter Lambert en Ursula, breurke van zus Maud en twieëlingbroor van zus Eva. ’n Ech vastelaovesgezin, Jeroen wèt ouch neet baeter as det ze van kleins aaf aan altied d’r oet ginge mit die daag. Neet zoeë gek dus det hae op zien 14e bie de jeugraod kwaam en vanaaf zien 18e bie de Bacchusklup. Mit as hoeëgtepuntj det d’r in 2023 veurop ging as Bacchus Oetje.

Twieë man sjterk
Veur ’t ieërs in de Beeselse gesjiedenis, haet de Drakeprins dit jaor neet eine, mer twieë adjudante. Sten (Simons) is natuurlik gènne ónbekènde veur idderein dae waal ‘ns wie de Troubadour kump. Daonaeve haet d’r ’n eige bedriefke in leech en geluid en dreijt d’r muziek op fieëste en partieje. Ferd (Beek) wèrk bie de Koninklijke Marechaussee en is in ziene vrieje tied regelmaotig te vinje op de velde van Bieslo as lid van de selectie. Allebei is ’t vastelaovesgeveul häör net as prins Jeroen mit de paplaepel ingegaote.

Verras
Zoeëwaal prins Jeroen as de adjudante Sten en Ferd ware verras door de vraog die häör waerde gesjtèld. In positieve zin! Jeroen: “Ich waas drök aan ’t klusse wie vors Mark mich de vraog sjtèlde. Ich mós d’r efkes euver nadinke vanwaege alle verbouwwerkzaamhede op det moment, mer besefde al sjnel det dit natuurlik get hiel biezónjers is óm as Beeselse jóng mit te moge make.” Ouch Sten en Ferd zoge dit neet aankómme, mer weite ein dink hiel zeker: mit zien drieje gaon zie d’r ’n geweldig en ónvergaetelik fieës van make!

De receptie van prins Jeroen II en adjudante Sten en Ferd is op zaoterdig 14 fibberwari vanaaf 20.30 oer bie Hoeve de Bongerd.

Wae waerd de nieje Drakeprins (CV de Drake)

𝘋𝘦 𝘢𝘢𝘧𝘨𝘦𝘭𝘰𝘶𝘱𝘦 𝘮𝘢𝘰𝘯𝘥𝘫𝘦 𝘮𝘰𝘰𝘨𝘥𝘦 '𝘯 𝘢𝘢𝘯𝘵𝘢𝘭 𝘨𝘳𝘰𝘦𝘱𝘦 𝘪𝘯 𝘉𝘦𝘦𝘴𝘦𝘭 𝘳𝘢𝘰𝘫𝘦 𝘯𝘢𝘰 𝘥𝘦 𝘯𝘪𝘦𝘫𝘦 𝘋𝘳𝘢𝘬𝘦𝘱𝘳𝘪𝘯𝘴. 🕵️‍♀️

Ónger dees groepe waerde sjtieëds nieje hints versjpreid die get vertèlde euver de nieje prins.

Hoeëg tied óm dees hints ouch te deile mit de res van 't dörp!

𝗪𝗮𝗲𝗺 𝘄𝗮𝗲𝗿𝘁 𝘃𝗼𝗹𝗴𝗲𝘀 𝘂𝗰𝗵 𝘃𝗮𝗻𝗮𝗼𝗻𝘃𝗲𝗻𝗱 𝗱𝗲 𝗻𝗶𝗲𝗷𝗲 𝗗𝗿𝗮𝗸𝗲𝗽𝗿𝗶𝗻𝘀?

 𝗠𝗮𝗮𝗸 '𝘁 𝗺𝗶𝘁 𝘃𝗮𝗻𝗮𝗮𝗳 𝟮𝟬.𝟬𝟬 𝗼𝗲𝗿 𝗯𝗶𝗲𝗷 𝗛𝗼𝗲𝘃𝗲 𝗱𝗲 𝗕𝗼𝗻𝗴𝗲𝗿𝗱! 💙💛

17 Januari 2026 (Bron: CV de Drake)

Tags: #Carnaval, #Beesel, #Prins Uitroepen,  #Events,