1986 Ruiverse Revue - De Broëlôf

Oppe Ruiver geit alles - De Broëlôf (Ruiverse Revue)

Ter beschikking gesteld door Hay Clabbers.

Nao 't sukses van de iërste revue kós ein 2e edisie neet oëtbliëve. Ónger aanveuring van Toon Geerlings waerde dit in nog gèn twië jaor gerejaliseerd. Biejna alle sjpelers van 1984 nome deil aan en de kersverse nieje börgemeister van ós gemeinte Beesel Constant Nuytens, mit ziene nieje gemeinteraod, kreeg ein prominente plaats in dees revue. Maar auch dörpsfiguur kapper Neutje, gesjpeeld door Jack Pollen en de herinneringe aan de dames van de Ruiverse Troika zorgde veur eine lach en ein traon. Sef Apeldoorn zóng ein aangriepend liedje euver dees Russische maedjes.

Óntsjtaon van de Ruivere Revue
Veur 't óntsjtaon van de Ruivere Revue mótte veur wiëd truuk in de tiëd, nao de tiëd van SVHR (Sportvereniging Hercules Reuver). Behalve 't beoefene van sjport haet dees vereiniging ein hiël belangrieke biejdrage geleverd aan 't culturele laeve oppe Ruiver. In ;de 2e oëtgave van 'Sportschakel' van 7 november 1946 laeze veur 'Reserveert voor uw bezoek aan de non-stop-revue een van volgende dagen: 9, 10 of 16 februari 1947'.   

Dees Ruiverse revues vónge drék nao de twiëde Waereldoorlog plaats. Laurens Pollen, Sjra Geijzen en de Tarzans mit o.a. Joep Hermans, Jan Theunissen, Wim Niemans en Huub Theunissen, ware de sjpelers in dees revues, die waerde oëtgeveurd in de gymzaal van ‘t Heilig Hart kloëster.

't Begin van de revues zoe wie veur ze vandaag de daag kenne, óntsjting t.g.v. 't 33-jäörig jubileum van Vastelaovesvereiniging De Windjbuujels in 1984. 't Initiatief  hiejveur kwaam van Toon Geerlings, destiëds besjtuurslid. Hae vroog Ger Geerlings en Nol Wassen om same mei tékste en meziek te sjriëve veur ein niej Ruiverse Revue 'Ich druim mich d'n hemel'. In 't aaje gemeinsjapshoës 'De Schakel' aan de Pesjtoër Vranckenlaan bezóchte miër as 1500 miense de iërste Ruiverse revue.Nao dit sukses waerde ein aparte vereiniging   opgerich, die zich toet doel sjtelde óm idder   twië jaor ein niej revue oppe plenk te  bringe. Onger veurzittersjap van Toon Geerlings waerde in 1986,  1988, 1991 (veur 't iërs in de nieje Sjakel), 1993 en 1995 dees niej revues oëtgeveurd.

‘t 5 x 11-Jäörig jubileum van (wéér) De Windjbuujels waerde de katalisator veur eine nieje sjtart. De Stichting Ruiverse Revue o.l.v. Gerard Ligthart goof opdrach óm in 2006 ein niej revue oppe plénk te bringe. Ron Aspers, Har Geraeds, Jan Stinges en Peter Winkels (destiëds teves regisseur) ware de sjriëvers van de nieje revue mit de passende titel ‘Veur pakke de draod weer op’. Ron, Har en Jan deeje det in 2011 euver (”Wao gaon veur haer?!) en auch in 2017 (‘De Negende’).

Nao de corona-periode is de draod weer opgepak en sjreve Jan en Ron de niej revue "Is det zoeë?". 

1986 (Bron: Hay Clabbers)

Tags: #RuiverseRevue, #Reuver, #Toneel, #Muziek, #Vroeger,